ខ្ចីលុយត្រូវដឹង! សោហ៊ុយ និងការផាកពិន័យក្នុងការខ្ចីឥណទាននៅកម្ពុជា

ការសម្រេចចិត្តខ្ចីលុយពីធនាគារ ឬគ្រឹះស្ថានមីក្រូហិរញ្ញវត្ថុ (MFIs) គឺជាជំហានសំខាន់មួយសម្រាប់បុគ្គល និងអាជីវកម្ម។ ដើម្បីជៀសវាងការភ្ញាក់ផ្អើល និងគ្រប់គ្រងហិរញ្ញវត្ថុប្រកបដោយប្រសិទ្ធភាព អ្នកត្រូវស្វែងយល់ឱ្យច្បាស់អំពីសោហ៊ុយ និងការផាកពិន័យដែលអាចកើតមាននៅកម្ពុជា។

១. ការប្រាក់៖ តម្លៃនៃលុយខ្ចី

• ការប្រាក់ គឺជាតម្លៃដែលអ្នកត្រូវបង់សម្រាប់លុយដែលអ្នកបានខ្ចី។ អត្រាការប្រាក់អាចប្រែប្រួលអាស្រ័យលើប្រភេទប្រាក់កម្ចី លក្ខខណ្ឌ និងគ្រឹះស្ថានហិរញ្ញវត្ថុ។

២. សោហ៊ុយដែលធនាគារ ឬ MFIs គិត:

• សោហ៊ុយឥណទាន (Loan Fee): ថ្លៃសេវាសម្រាប់ដំណើរការស្នើសុំប្រាក់កម្ចីរបស់អ្នក។
• សោហ៊ុយបម្រុងសាច់ប្រាក់ (Commitment Fee): បង់លើទឹកប្រាក់ដែលបានអនុម័ត ប៉ុន្តែអ្នកមិនទាន់បានដកយកទាំងអស់។
• សោហ៊ុយត្រួតពិនិត្យឥណទាន (Credit Check Fee): ថ្លៃសេវាត្រួតពិនិត្យប្រវត្តិឥណទានរបស់អ្នកពី CBC (Credit Bureau Cambodia)។
• សោហ៊ុយរៀបចំឯកសារ (Documentation Fee): សម្រាប់រៀបចំកិច្ចសន្យា និងឯកសារពាក់ព័ន្ធ។
• សោហ៊ុយរដ្ឋបាល (Administrative Fee): ថ្លៃសេវាសម្រាប់ការគ្រប់គ្រងគណនីប្រាក់កម្ចីរបស់អ្នក។

៣. សោហ៊ុយចំណាយផ្សេងៗ:

• សោហ៊ុយបញ្ជាក់មេធាវី/សារការី: ថ្លៃសេវាបញ្ជាក់ឯកសារពីមេធាវី ឬសារការីទៅតាមទំហុំឥណទាន។
• សោហ៊ុយវាយតម្លៃទ្រព្យធានា: បង់សម្រាប់សេវាវាយតម្លៃទ្រព្យបញ្ចាំទៅក្រុមហ៊ុនវាយតម្លៃអចលនវត្ថុ។
• សោហ៊ុយបញ្ជាក់អាជ្ញាធរមូលដ្ឋាន: ថ្លៃសេវាស្នើសុំឯកសារបញ្ជាក់ពីអាជ្ញាធរមូលដ្ឋាន។
• សោហ៊ុយចុះ/ដោះបន្ទុកលើអចលនទ្រព្យ: ថ្លៃសេវាចុះបញ្ជី ឬដោះបន្ទុកទ្រព្យបញ្ចាំនៅមន្ទីរសុរិយោដី។
• សោហ៊ុយចុះសុក្រឹតកម្មលើសន្និធិទំនិញ និងចលនទ្រព្យ: ថ្លៃសេវាចុះបញ្ជីទ្រព្យបញ្ចាំនៅក្រសួងពាណិជ្ជកម្ម។

៤. សោហ៊ុយលើការផាកពិន័យលើការខកខានសងប្រាក់៖

• ការខកខានសងប្រាក់តាមកាលកំណត់នឹងត្រូវទទួលរងការផាកពិន័យ។
  • អត្រាពិន័យ: ភាគរយ ឬចំនួនថេរដែលគិតបន្ថែមលើទឹកប្រាក់ដែលខ្វះ។
  • ការគណនា: គ្រឹះស្ថានហិរញ្ញវត្ថុនីមួយៗមានរូបមន្តគណនាខុសៗគ្នា។
  • ការយឺតយ៉ាវក្នុងការបង់ប្រាក់អាចបង្កឲ្យមានបញ្ហាដូចជា៖
    • ខូចពិន្ទុឥណទាន
    • ចំណាយសេវារំលឹកការបង់ប្រាក់
    • ត្រូវទទួលសកម្មភាពផ្លូវច្បាប់។

គន្លឹះសម្រាប់អ្នកខ្ចីប្រាក់:

• ប្រៀបធៀបអត្រាការប្រាក់ និងសោហ៊ុយពីគ្រឹះស្ថានហិរញ្ញវត្ថុផ្សេងៗគ្នា។
• សួរឱ្យបានច្បាស់លាស់អំពីសោហ៊ុយ និងកាតព្វកិច្ចមុននឹងចុះកិច្ចសន្យា។
• រៀបចំផែនការសងប្រាក់ឱ្យបានច្បាស់លាស់ ដើម្បីចៀសវាងការខកខាន។