ឧក្រិដ្ឋកម្មហិរញ្ញវត្ថុក្នុងលំហូរពាណិជ្ជកម្ម (Trade Based Financial Crime)

ឧក្រិដ្ឋកម្មហិរញ្ញវត្ថុក្នុងលំហូរពាណិជ្ជកម្ម (Trade Based Financial Crime) គឺជាប្រភេទនៃបទល្មើសមួយចំនួនដែលប្រើប្រាស់ពាណិជ្ជកម្មអន្តរជាតិដើម្បី លាងសម្អាតប្រាក់​ (Money Laundering) ផ្ដល់ហិរញ្ញប្បទានភេរវកម្ម (Financial Crime) និងរំលោភលើការដាក់ទណ្ឌកម្ម (Sanctions)។ ឧក្រិដ្ឋកម្មទាំងនេះ ជាទូទៅរួមមាន៖ បង្កើតវិក័យប័ត្រដែលមាន តម្លៃខ្ពស់ឬទាបជាងតម្លៃទីផ្សារ (Over or Under Invoice) ការបង្កើតវិក័យប័ត្រច្រើនដងសម្រាប់ការដឹកជញ្ជូនមួយលើក(Multiple Invoice) ការដឹកជញ្ជូនលើស ឬក្រោមវិក័យបត្រ(Over and Under Shipment) និងប្រឌិតការដឹកជញ្ជូន​(Phantom Shipment)។

1-បង្កើតវិក័យប័ត្រដែលមាន តម្លៃខ្ពស់ឬទាបជាងតម្លៃទីផ្សារ (Over or Under Invoice)៖ ការកំណត់តម្លៃទំនិញតិចឬច្រើនជាងទីផ្សារនៅលើវិក័យប័ត្រ ក្រោមឬលើសតម្លៃ ទំនិញ និងសេវាកម្ម នៅលើទីផ្សាគឺជាវិធីសាស្រ្តដែលអ្នកលក់និងអ្នកទិញ ឃុបឃិតគ្នា ដើម្បីសម្អាតប្រាក់កង្វក់។ ជារឿយៗអ្នកទិញ និងអ្នកលក់អាចជាក្រុមហ៊ុនបុត្រសម្ព័ន្ធ ឬមានទំនាក់ទំនងគ្នាស៊ីជម្រៅតាមរបៀបផ្សេងៗទៀត។ 

ចំណុចសំខាន់ៗ:

• បង្កើនតម្លៃ: បង្កើតវិក័យប័ត្រក្នុងតម្លៃខ្ពស់ជាងការពិត ដើម្បីផ្ទេរប្រាក់ចេញ។
• បញ្ចុះតម្លៃ: បង្កើតវិក័យប័ត្រក្នុងតម្លៃទាបជាងការពិត ដើម្បីផ្ទេរប្រាក់ចូល។
• ឃុបឃិតគ្នា: អ្នកទិញ និងអ្នកលក់សហការគ្នា។
• ពិបាករកឃើញ: ជាពិសេសក្នុងប្រតិបត្តិការស្មុគស្មាញ ឬទំនិញប្រណិត។

ឧទាហរណ៍ ការបង្កើនតម្លៃ:

អ្នកនាំចេញលក់ទូរទស្សន៍ ១០០ គ្រឿង ដល់អ្នកនាំចូល ក្នុងតម្លៃ ៥០០ ដុល្លារអាមេរិកក្នុងមួយគ្រឿង។ អ្នកនាំចេញបង្កើតវិក័យប័ត្រឱ្យអ្នកនាំចូល ១០០,០០០ ដុល្លារអាមេរិក ដោយអ្នកនាំចូលបានបង់ ១,០០០ ដុល្លារអាមេរិកក្នុងមួយគ្រឿង។ ក្នុងករណីនេះ ជំនួសឱ្យការបង់ ៥០,០០០ ដុល្លារអាមេរិក សម្រាប់ទំនិញដែលមានតម្លៃ ៥០,០០០ ដុល្លារអាមេរិក អ្នកនាំចូលបានបង់ ១០០,០០០ ដុល្លារអាមេរិក ដែលបណ្តាលឱ្យអ្នកនាំចេញទទួលបានប្រាក់បន្ថែម ៥០,០០០ ដុល្លារអាមេរិក។ 

2-ការបង្កើតវិក័យប័ត្រច្រើនដងសម្រាប់ការដឹកជញ្ជូនមួយលើក(Multiple Invoice)៖

វិធីសាស្ត្រនេះត្រូវបានប្រើប្រាស់ដោយអ្នកសម្អាតប្រាក់តាមរយៈការធ្វើពាណិជ្ជកម្មដោយអ្នកលក់ចេញវិក័យប័ត្រទៅឱ្យអ្នកទិញច្រើនដងសម្រាប់ប្រតិបត្តិការដឹកជញ្ជូនទំនិញមួយលើក។ការទូទាត់ដែលធ្វើឡើងក្រោមវិក័យប័ត្របន្ថែមទាំងនេះអនុញ្ញាតឱ្យមានផ្ទេរប្រាក់ពីអ្នកទិញទៅអ្នកលក់ក្រោមលេសថាអ្នកទិញកំពុងទូទាត់ទំនិញជូនអ្នកលក់។ ការទូទាត់ប្រាក់បន្តបន្ទាប់គ្នាតាមរយះវិក័យប័ត្រជាច្រើនលើការទូទាត់ថ្លៃទំនិញដែលបានដឹកជញ្ជូនតែម្តងធ្វើឲ្យឧក្រិដ្ឋជនអាចសម្អាតប្រាក់កង្វក់របស់ខ្លួនបាន។

3-ការដឹកជញ្ជូនលើស ឬក្រោមវិក័យបត្រ(Over and Under Shipment)៖ 

ការដឹកជញ្ជូនលើស និងក្រោមវិក័យបត្រ ជាវិធីសាស្រ្តលាងសម្អាតប្រាក់ ស្រដៀងគ្នាទៅនឹងវិធីសាស្រ្តបង្កើតវិក័យប័ត្រដែលមាន តម្លៃខ្ពស់ឬទាបជាងតម្លៃទីផ្សារ។ វិធីសាស្រ្តនេះ អ្នកទិញ ឬ អ្នកនាំចូល និងអ្នកលក់ ឬ អ្នកនាំចេញ ឃុបឃិតគ្នាដើម្បីបង្កើតអញ្ញាតប័ណ្ណដឹកជញ្ជូន (bill of Lading) និងឯកសារដឹកជញ្ជូនផ្សេងទៀត (shipping documents)ក្លែងក្លាយ។ ភាគីទាំងពីរនឹងបង្កើតឯកសារដូចជា អញ្ញាតប័ណ្ណដឹកជញ្ជូន និងឯកសារផ្សេងទៀតដែលបង្ហាញពីបរិមាណទំនិញ ឬតម្លៃមិនត្រូវនឹងការពិត។ ឯកសារទាំងនេះត្រូវបានក្លែងបន្លំឱ្យមើលទៅមានភាពស្របច្បាប់ ដើម្បីបញ្ឆោតធនាគារ និងអាជ្ញាធរពាក់ព័ន្ធផ្សេងទៀត។

• ការដឹកជញ្ជូនលើស: អ្នកលក់នឹងបង្ហាញបរិមាណទំនិញក្នុងវិក័យប័ត្រច្រើនជាងពិតប្រាកដដែលបានដឹកជញ្ជូន។ ដោយសារអ្នកទិញបង់ប្រាក់តាមបរិមាណដែលបានបង្ហាញក្នុងវិក័យប័ត្រ អ្នកលក់នឹងទទួលបានប្រាក់បន្ថែមសម្រាប់ទំនិញដែលមិនបានផ្ញើទៅ។ 
• ការដឹកជញ្ជូនក្រោម: អ្នកទិញនឹងបង្ហាញបរិមាណទំនិញក្នុងវិក័យប័ត្រតិចជាងពិតប្រាកដ។ ដោយសារបង់ប្រាក់តិចជាង ប៉ុន្តែទទួលបានទំនិញច្រើនជាង អ្នកទិញនឹងទទួលបានផលប្រយោជន៍។

4-ប្រឌិតការដឹកជញ្ជូន​(Phantom Shipment)៖ 

គឺជាវិធីសាស្រ្តដើម្បី លាងសម្អាតប្រាក់កង្វក់ មួយប្រភេទ ដែលអ្នកនាំចេញបង្កើត អញ្ញាតប័ណ្ណដឹកជញ្ជូន (bill of Lading) និងឯកសារដឹកជញ្ជូនផ្សេងទៀត (shipping documents)ក្លែងក្លាយដើម្បីបញ្ជាក់ថាបានដឹកបញ្ជូនទំនិញទៅឱ្យអ្នកទិញ ប៉ុន្តែទំនិញមិនត្រូវបានដឹកជញ្ជូនពិតប្រាកដនោះទេ។ការប្រឌិតការដឹកជញ្ជូននេះជាឧបករណ៍មួយដែលប្រើដើម្បីលាក់បាំងប្រតិបត្តិការផ្ទេរប្រាក់ខុសច្បាប់ ដោយបង្កើតការបំភាន់ថាមានការជួញដូរពាណិជ្ជកម្មពិតប្រាកដកើតឡើង។